المسیح داڄمݨاں

حضرت متّی دی اِنجِیل سیدنا مسیح ابن داؤد ابن اِبراہیم دے شجرے کنُوں شروع تھیندی ہے۔ اِیندے علاوہ  ہِک ٻَئی کتاب ہے جیرھی  شجرہ بیان کر یندی ہے اتے ایہ بائبل  مقدس دی پہلی کتاب پیدایش ہے جَیندے پَنجویں باب دی پہلی آیت ءِچ ایہ شجرہ بیان کیتا ڳئے۔ میݙے بھِرا ایہ حضرت آدم دا شجرہ ہے پہلا شجرہ جیرھا جو سیدنا مسیح دا شجرہ ہے ایہ حیاتی دا شجرہ ہے اتے ݙوجھا شجرہ جیرھا جو حضرت آدم دا شجرہ ہے او موت دا شجرہ ہے۔ سیدنا مسیح دے شجرے ءِچ چار تریمتیں دے ناں شامل ہِن۔ اِنہیں تریمتیں دے ناں ہِن پہلی تریمت دا ناں تمر جَیندا بیان تریجھی آیت ءِچ کیتا ڳئے۔ وَل ݙوجھی تریمت ہے اِیندا ناں ہے راحب۔ راحب یریحو شہر دی ہِک فاحشہ ہَئی۔جݙاں اِیں فاحشہ تریمت کُوں اللہ دے بارے ءِچ پتا چلیا تاں ایہ فوراً اِیمان گھِن اَئی اتے  بختیں آلی تریمت بݨ ڳئی۔ عبرانیوں دے خط ءِچ اِیندے بارے اِیویں لکھیا لاتھے”اِیمان نال ہی راحب فاحشہ نافرمانیں دے کٹھے ہلاک نا تھئی”۔ کیوں جو اُوں جاسوسیں کُوں لُکائی رکھیا کیوں جو اُوندا اِیمان ہا۔